Actualidade > Novas > noticia-detalle

Mouriscade mantense como o laboratorio de referencia no noroeste peninsular, con 68.500 mostras analizadas

11 de marzo de 2017

O laboratorio de Mouriscade segue mantendo a súa posición de referencia no noroeste peninsular no campo das análises de alimentación animal. O balance de 2016 arroxa un total de 68.500 mostras analizadas, o que representa un incremento do 10,67 % con respecto ao anterior exercicio. "Este pequeno incremento é importante por canto nos permite facer unha lectura positiva do traballo realizado polo equipo técnico do laboratorio, así como da boa consideración que este traballo ten entre os diferentes axentes do sector, posto que seguen mantendo a confianza e encomendándolle as súas análises", sinalou a deputada delegada da Finca Mouriscade, Eva Vilaverde, ao respecto destes datos.

Do total das mostras analizadas, o 47,51 % proceden de explotacións galegas e o 52,4 8% restante son doutras comunidades autónomas e de Portugal. Tamén hai que salientar que a Deputación segue mantendo a súa política de ofrecerlles servizos aos gandeiros e gandeiras e cooperativas da provincia a custo cero. Así, durante o ano 2016, en relación á identificación de xermes de mostras en leite, Mouriscade analizou un total de 17.174 mostras procedentes da provincia de Pontevedra, o que representou un aforro para os gandeiros e gandeiras da provincia de 89.304 euros. A estas mostras hai que engadir as relativas a alimentación animal, isto é, as referidas a ensilados, que sumaron un total de 2.171 mostras, o que representou un aforro para os gandeiros da provincia de 18.236 euros. Entre ambas as liñas, o aforro para os gandeiros e gandeiras da provincia ascendeu a 107.540euros. Neste sentido, Eva Vilaverde volveu insistir que "as administracións debemos colaborar en todo o posible para apoiar un sector que tradicionalmente sempre tivo moitas dificultades, porque consideramos que é un sector estratéxico para o noso país, e nomeadamente para unha comarca con tanta actividade agrogandeira como é a de Deza".

En canto á explotación gandeira de Finca Mouriscade, segundo a avaliación xenética de Conafe de novembro de 2016, esta foi cualificada no grupo de gandarías de 76 a 200 reprodutoras, cun ICO de 2.400. Esta cualificación sitúa a explotación de Mouriscade no posto número 1 a nivel da provincia de Pontevedra, no posto 10 no ámbito de Galicia e no posto 26 a nivel estatal.

En canto ao programa de transferencia embrionaria, Mouriscade realizou un total de 68 recollidas de embrións, das que 41 se realizaron na propia explotación e as 27 restantes en explotacións da provincia de Pontevedra. Tamén, no pasado exercicio, realizáronse 271 transferencias de embrións a vacas receptoras, das que o 94,5 % se realizaron en gandarías externas.